測驗八卦

031410

­­­­­­一本雜誌
最緊要有 心理測驗
最最緊要有 未來一星期的運程
雜誌內容我不看
買回來一翻翻到後面
完成心理測驗
預計完自己運程
雜誌便送到廢紙回收
回贈幾毫子雖小
但那心理測驗和星座運程經已值回票價

如常地翻到雜誌後面
發現平日的心理測驗今期搞搞新意思
成了身心生心理測驗

“”以下兩條問題各自反映出閣下的身心生心理狀態
請於十秒內作出選擇  一切憑直覺

題一
身處在細小電梯內的你
正從十五樓向下
有臭屁要放
你會選擇在什麼環境下發出
a  一個滿人的電梯內
b  一個空的電梯 只有你一個
    十樓有人入電梯 到時臭味由來一清二楚

題二
有人向你表白
那一句富有詩意的說話令你有反應
a  如果我對你的愛是大便
    那麼我已便秘了一生
b  我希望可以拖著你的小手
    一起攀到我的乳雲上
    遠眺著你的乳頭  “”

在十秒內 我真的答不出來
憑什麼鬼直覺
立即翻看分析

“第一題選 a – 你愛與大眾分享
 第一題選 b – 你愛與小眾分享
 第二題選 a – 你的愛情觀很臭
 第一題選 b – 你很浪漫”

分析得十分仔細
我懷疑心理測驗的存在價值
立即翻看第二最愛  一週星座運程

“星期日 – 今天的你比平日清閒
 星期一 – 新一週忍耐一下, 將會有一個超快樂的週末
 星期二 – 會遇到很多陌生人  要有準備
 星期三 – 異性緣十分好
 星期四 – 異性緣非常糟糕
 星期五 – 午飯時份會破財 小心為妙
 星期六 – 你的週末超級無聊 ”

雖然明天才是星期日
但我已經感到非常準確
我懷疑一週運程的存在價值

有得闆先至係老揀

031410

下樓去把雜誌回收
途經見到有一梁家傑助選團的人員在派傳單
奇奇奇 ! ! !
明明選舉已過
他還在搞什什麼麼
我還未走近
他已經十個箭步埋我身
送上傳單說
“請在2012年投梁家傑一票”
“嘩. 駛唔駛咁早呀…” 我怪叫
“有得揀先至係老闆” 他誠懇地說
“嘩  2012年又用番同一句 好 冇誠意” 我黑面說
“你都想做老闆啦  支持一下” 他推銷著
我問 “邊個話老闆一定有得揀
我唔係老闆都可以為自己揀好多野”
他呆兩秒說 “有得揀先至係老闆  支持下”

我見他毫無新意又對他說說
“而家我地揀特首
即係為我地自己為香港揀出一個老闆話事人
咁選左你地做老闆
我地又點會仲係老闆 ?”
他拿出深藍色格仔手巾抹去額上的汗珠解釋
“有得揀大家都係老闆”

我又見他毫無新意再對他說
“現在的社會
沒有誰是老闆
老闆上面一定有終極老闆
終極老闆以為自己是大老闆
其實他後面還有一大堆終終極極大老闆
所以人人以為自己係老闆 ”
他滿面冷汗傻笑大叫
“有得闆先至係老揀….有老闆先至揀得闆…”
重覆又重覆
眼見他機件開始冒煙
我拿著廢紙回收的兩毫子以小跳步跳走

顏花油

031410

我可能命不久矣
腦中不停閃過人生幾段重要畫面

我看見一對母女開心買零食唱著
“曾同度過漫長的歲月   關心你每處為你看多一點
 時日度過亦全不變樣   天天有你伴我創造美好….”
小女孩回牟一笑
電暈多少嬰孩兒童

我看見失控的士司機被乘客怒罵用愛膚堅

我看見日本忍者用輕工跳入家居
準備用劍幫手殺蟑螂
幸得旁白提醒請勿動粗

我看見花生先生花生小姐跳舞唱著
” 金龜嘜萬里望花生 Very Good 卜卜脆
任何場合都要佢”

我看見曾江一頭黑髮
誠心誠意介紹我用美源髮彩
不趕時間的我正想要頭髮逐漸變黑
現在一頭白髮的他應該不是代言人

我看見一名家庭主婦被朋友詢問為何老公穿黃色內褲
原來洗衣粉出問題

一大堆童年回憶湧現
相信我命不久矣

從小知道
愛膚堅廣告後必定是黑旋風廣告
它們是一體  永遠分不開  見怪不怪
早前竟然看見它們兩老出現在假日的黃金時段
實在出奇 !
為什麼它們永遠連在一起
為什麼它們可以生存至今
為什麼兩個不同品牌可以同時支付起黃金時段廣告收費
為什麼它們寧願支付黃金價也不花點錢去弄一個較合潮流的新版廣告
現時廣告公司真的太差?
這兩個品牌如不是同一老闆所有
那默契實在太好

經過多晚思索
我報夢給自己得知
多個兒時廣告可以生存至今的原因
完全是電視台要留給我們一代的集體回憶
實在感動
看見老廣告穿插在三維數碼科幻設計複雜虛偽的現代廣告中
老廣告的簡單正接竟然吸引我
可能是所謂的集體回憶在作祟

最近白花油廣告熱播
幾乎一日五十次  每次一分鐘
顏先生的歌不停入腦
希望成為金龜嘜 時興隆等上口廣告歌
為新一代製造著未來的集體回憶
我倒欣賞他的熱誠幹勁
出錢出碟出音樂影帶出廣告
捨得花錢花時間在自己熱愛的音樂上
錢他是多
但有如此幹勁為自己熱愛的事作出投資作出犧牲的人
不論所做出來的效果都是應該尊敬
就如夏金城 張如城等人
他們更要錢不多 都為自己而付出
在邊看他們音樂影帶邊笑的同時
我尊敬他們

“能簡約地愛多八十年  態度未曾改變…”
一日五十次  每次一分鐘
他的幹勁不停輸入腦中

愛睡的我只想
能簡約地訓多八十年
愛打網上槍戰遊戲的弟弟希望
能簡約地殺多八十人
愛買股票的娘嚷著
能簡約地升多八十點
討厭顏先生在廣告中跳舞的爸要求
能簡約地禁播八十年

相信此廣告要成為未來集體回憶之一
還有一段距離
顏同志仍需努力

小人阿強

031410

花了整整一年時間去研究
關於小人國在十七世紀的滅亡
由收集資料到分析直到有結論
原來小人國還有餘生
最關鍵的一刻
莫過於找尋到現代最後一位小人國居民 – 阿強

阿強是前小人國國家籃球代表隊的主力中鋒
體型和我尾指指甲差不多
高八毫米闊十一毫米
他沾沾自喜道出自己運動生涯中的十大灌籃場面
又從袋中抽出大小獎牌

阿強又講述自己多次親眼見到小人國國民被殺害
又眼巴巴看著家人被大拖鞋壓打至死
又有自己逃亡經歷

訪問中激動落淚  之後更加暈倒
攝製隊被嚇得手忙腳亂
身為主持人的我慌而不亂
立即應用急救小智慧
希望先將上衣解開
保持他呼吸暢順

身為主持人的我慌而不亂
伸手輕輕解開他頸上的鈕扣
可惜多用了丁點奶力
壓得阿強五官腸臟噴射到我指尖上

花了整整一年的時間
我研究出小人國滅亡的原因
我更成為小人國滅亡的原因

Twins is Nothing

031410

早排電視係咁播 Adidas 廣告
一班國際運動明星每人講下自己 Impossible is Nothing 既人生經歷
好開心見到香港都終於有兩個上榜
幫手推推香港個市場

第一位係永不言和李健和
大談自己當年心火盛怒 “省” 球證
威震四方
坐波監一年後
再次披甲上陣
永不言敗

另一位係異父異母樂壇雙生兒之一既阿嬌
大談自己當年中學苦練跨欄
為左學屆日練夜練至一雙壯腿
最後更獲亞軍
得來全不容易

睇完外國一班體壇巨星同埋香港兩位既心聲後
我覺得阿嬌能參與其中都幾 Impossible is Nothing

第一眼見到阿嬌既出現
我仲諗住會分享一下
佢初入行點樣苦練唱現場夾口型又唔俾人發現
又諗住會分享一下點樣苦練一邊唱歌一邊耍雜技打跟斗
點知錯曬
點都搵番件同運動有關既陳皮往事

我明白要就住香港市場
咩市場就要做咩廣告
而家有話著 Adidas 一定要運動咩
大把潮流人追捧 Adidas
都不知幾有型
分分鐘鐘顧客俾阿嬌吸引多過李健和
後生個班客仲死
李健和 ?? 邊個呀 ?? 和仔 ?? 英皇新人呀 ??
用阿嬌真係穩陣好多

好 Impossible 咁諗
兩個香港代表廣告係外國播出
西人一定識阿嬌多
起碼拍過幾部大製作電影啦
不過見佢出現係 Adidas 既 Impossible is Nothing 系列入面
西人可能又真係以為佢係跨欄巨星都唔定
都幾搞野

其實阿嬌幫 Adidas 賣廣告冇咩大不了
不過係一整個有主題有系統既廣告之中
一班國際運動巨星入面出現一位香港中學學屆運動之星
我只係覺得阿嬌佢好突出

試下叫李麗珊出黎
分享自己運動生涯既辛酸
分享下點樣要幾百萬先養得起個細路
仲 Impossible is Nothing 啦
再唔係
叫方力申出黎
分享自己當年為香港泳隊創下多個紀錄
又分享成為藝人後日日唱自己俾女飛既慘情金曲
要我唱都幾 Impossible
又再唔係
借幾個 Nike 人過黎拍個 Adidas 廣告
更加表達到 Impossible is Nothing
又再再唔係
去波鞋街叫個炒鞋專家出黎
分享一下波鞋炒價屢創新高
波鞋好似股票都有得炒
Impossible is Nothing

再睇睇 Adidas HK 個網
“阿嬌的故事” 就大大張
運動員李健和就放埋一邊

香港單車皇子黃金寶
香港奧運乒乓孖寶李靜 高禮澤
仲有一班又辛苦又有成績既香港運動員
努力向太陽前進吧